اساسيات انشاء شبكه لاسلكيه جديده

اساسيات انشاء شبكه لاسلكيه جديده

الكاتب : Unknown التاريخ : مارس 10, 2013

(انا هعمل شبكة لاسلكية محتاج ايه؟؟ )
كتبت موضوع متواضع عن اساسيات تركيب شبكة لاسلكية
بطريقة مبسطة ومختصرة عشان العضو الي لسة جديد في الموضوع دة يفهمه علي طول

بسم الله الرحمن الرحيم

نظرا لتكرار اسئلة الاعضاء
(انا هعمل شبكة لاسلكية محتاج ايه؟؟ )
كتبت موضوع متواضع عن اساسيات تركيب شبكة لاسلكية
بطريقة مبسطة ومختصرة عشان العضو الي لسة جديد في الموضوع دة يفهمه علي طول
ويكون الموضوع دة موجود لاي حد جديد
بدل ميدخل يسال نفس السؤال تاني

نبدا ببسم الله

هنتكلم الاول علي الاساسيات اللي محدش هيختلف عليها:

انت هتحتاج برج ارسال رئيسي وده هيكون عندك فوق بيتك او اي بيت تاني اعلي
ودي بتركب عليها الجهاز اللي بيبث +الانتنا (الهوائي)
وتحتاج ابراج استقبال عند العملا بردو

ودي بيركب عليها اي اكسس او كارت واير ليس

نتكلم بقي في التفاصيل :
برج الارسال:

المهم تعرف ان عبارة عن اكسس متركب علية انتنا مرفوع علي ماسورة عالية
الناس اختلفت في نوع الاكسس والانتنا دي كتير
حسب المساحة اللي عاوز تغطيها

وفى راى نوحد الاختيار لشبكات مدى 1 كيلو اكسسات بافلو وبيكوستيشن ( افضل اداء مقابل التكلفه )
و2 كيلو فيما فوق بوليت وروتر بورد
علشان ما نحيرش الناس معانا

ــــــــــــــــــــــــــــــــــــــــــــــــــ ـــ

والخلاصة في تكاليف البرج دة
لو 1 كيلو 300-900 جنية
لو 2 كيلو او اكتر 1200-2100 جنيه

وانا مش هخوض فيها كتير
لان المفروض دلوقتي نفهم الاساسيات بس ولما نفهم الاساسيات وعاوزين نعرف حاجة معينة
نبقي نسال فيها
طيب اخترنا اكسس نوع معين هنعمل ايه؟؟
هتركبه علي ماسورة عالية 6-8 او اعلي
وكدة برج الارسال يقي تمام التمام

برج الاستقبال عند العملا:

دي يا اما باكسس بوينت او كارت وايرليس

الاكسس:
ممكن يوصل لاكتر من عميل لو قريبين من بعض عن طريق سوتش ببتركب عل ماسورة فوق علي السطح وبينزل منها سلك لان(dsl) للسويتش للتوزيع او كان جهاز واحد

الاكسس المعقول غالبا في الاستقبالTp-link501 ودة عامل حوالي 150جنية

ولو عاوز اكسس انضف وتريح بالك يبقي هات الاير ليف حوالي310 جنية

كارت الواير ليس:

لا يصلح الا لعميل واحد فقط
بيتركب في الكيسة تحت في فتحات الـPCI وبتركب الانتنا فوق عن طريق تطويلة سلك دش 50 اوم +كونكتور
الكارت :65جنيه Tp-link
السلك الـ50اوم:المتر 1.50جنية
الكونكتور 15 جنية

وانا رايي ابعد عن الكارت دة نهائي لان مشاكله كتير
ساعات التعريف وساعات السلك وغير ان السلك والكونكتر بيعمل فقد كبير جدا في الاشارة

طيب لما اعمل الشبكة هل ينفع استقبل داخل البيوت؟؟

لا للاسف مينفعش تستقبل الاشارة داخل البيوت وتبقي كويسة ومنتظمة
لان هتبقي فية عوائق في طريق الاشارة
وللاسف بردو التردد بتاع الاشارة دي (2.4ghz) مبيقدرش يخترق العوائق
فلازم ذي ما قولت قبل كدة تحط اكسس فوق المبني او كارت وتعملة تطويلة للانتنا

ولو عاوز اشغل لاب توب داخل البيت اعمل ايه؟؟

لو حد عاوز يشغل لاب توب ضروري
فدة ممكن يستقبل من فوق باكسس وينزل من الاكسس دة سلك لان لاكسس تاني
يشغلة ارسال في الشقة بتاعته وهيغطيها كلها ويقدر يتحرك باللاب توب ذي ما هو عاوز

بس الحكاية دي لها عيوب :

اولا :
هيحصل فقد في الاشارة اللي جاية من برة عشان السلك والكونكتور
تقريبا كل 15 متر سلك بيقلل الاشارة 6 دي بي

ثانيا :
مش هتقر تبعد اوي باللاب توب عن الاكسس لان الانتنا الداخلية ضعيفة
انا اقصي مسافة جابت معاي كانت 20 م من غير عوائق و 10 م بعوائق

ولها ميزة واحدة
ان انت هتستخدم اكسس واحد فقط

فانت جرب جابت اشارة من البرج الرئيس كويسة بالتطويله
وتحت غطت الشقة كلها تمام نفذها

انما بقي لو مجبتش اشارة من البرج (ضعيفة ) او كانت الشقة كبيرة ومغتطهاش كلها
يبقي بلاش منها وخليك في الحل الاولاني
(استقبل باكسس فوق وارسل باكسس تحت ووصل الاتنين بسلك لان عادي)

طيب انا لو عاوز انقل النت من مكان لمكان ؟؟
(مثلا قرية مفيهاش نت وهتاخد من مكان تاني)

هنجيب 2 اكسسين (بقول اكسسين للعموم في طبعا حاجات كويسة
في المجال دة ذي النانو والانتنا الياجي (الموجهة))
ونخلي اكسس يرسل النت من المكان اللي فية نت والثاني يستقبل من القرية اللي مفيهاش نت مثلا
ونربطهم بـنقطة الي نقطة (Point To Point)

بس عندش شوية نصايح عشان الشغل يبقيي تمام:

ـ راعي ان الاكسسين يكونو شايفين بعض مفيش بينهم عوائق
ـ وان الاكسسي يكونو قريبين من بعض في الارتفاعات
مش واحد في الدور الخامس وواحد في التاني
عشان الاكسسات دي انتنها اومني (360 درجة في المستوي الافقي) بس دة علي حساب المستوي الراسي
يعني كل ماتبعد عن مستوي الانتنا الافقي (الارتفاع) صعود ونزولا هتبعد عن مجال الاشارة
يعني يفضل يكونو علي ارتفاع واحد

ـ يفضل انك كمان تخليهم رابطين علي وضع Point to Point (من نقطة لنقطة)
علشان الاكسسين يربطو مع بعض وخلاص ومحدش تاني يربط معاهم ويهنج الاكسسات

ـ ويفض يكون سلك الكهربا اللي طالع يغذي الاكسسات كفائته عالية
وميقلش عن 1 مم وفي ناس بتقول 2 مم بس 1 كفاية اوي
لان ساعات سلك الكهربا دا بيكون طويل جدا 50 م مثلا ويكون سلك رديء جدا
علي ما الكهربا تطلع فوق بتبقي انعدمت خالص ودا بينعكس علي الاكسسات

طيب لو ركبت شبكة امتي الاشارة تبقي كافية
ان انا اشغل نت وانا مرتاح ؟؟
ولو اقل من كدة اعمل اية عشان ازودها ؟؟

الاشارة مفروض متقلش عن 30 دي بي والبنجات متزدش عن رقمين

لو ركبت الشبكة ولقيت النتيجة اقل من كدا
جرب حلول تانيه
ذي مثلا :
ـ تعلي الاكسسين شوية لو كان بينهم بعض العوائق
- او تغير مكان الاكسس المستقبل او المرسل (ان امكن)
ـ او تحط عواكس الومنيوم ورا الانتنات
ـ او تحط اطباق دش صغيرة وتركب الاكسسات عليها وتوجهم لبعض
ـ او تغير الانتنات بانتنات اعلي ذي 9 دي بي ان دور
ـ او تعمل حاجتين من الحاجات دول مع بعض
وهكذا.......... الافكار كتير المهم تعمل بنفسك وهتلاقي الموضوع ممتع جدا

طيب هل الاكسسات دي تستحمل الجو ؟؟

للاسف معظم الاكسسات الموجودة دي Indoor
ومتستحملش عوامل الجو
غير طبعا الحاجات الـ Outdoor ذي البوليت
معمولة تشتغل تحت ظروف الجو القاسية

طيب الاكسسات الـ Indoor ممكن احميها اذاي ؟؟

لازم نركبها في حاجة تحميها

ذي مثلا
علبة ووتر بروف جاهزة

وهي بصراحة جميلة جدا
بس انا لما دورت عليها ملقتهاش خالص

وممكن نجار يعملك علبة خشب
وتحط فيها الاكسس ويقفلها كويس
ويدهنها من برة غرا عشان يقويها
ويدهن فوق الغرا بوية بيضا عشان تعكس الشمس في الصبف
وتسد الفتحات الصغيرة عشان تمنع الميا تدخل في الشتا

طيب انا هعمل شبكة لا سلكية وممكن حد يلقط منها.. احميها اذاي؟؟

- لو الشبكة صغيرة باكسس بسيط:
يبقي تفعل خاصية Mac filter
من الاكسسس اللي بيبث وتلاقيها سهله في الاعدادات ان شاء الله
هتضيف ماكات الناس اللي مشتركين معاك فقط
لو الموضوع منفعش ممكن تعمل تشفير للاشارة
عن طريق الـwep اوwpa

- طيب لو الشبكة كبيرة وموصل لعملا كتير وعاوز اتحكم فيها اكتر؟؟

يبقي هتستخدم سيرفر!!
السيرفر دة حاجة بتخليك تتحكم تحكم كامل بالشبكة بتاعتك وحمايتها من التطفل عليها
وممكن من خلالها تحدد سرعات وتعمل منها اكونتات (حسابات للعملا) تديهم يوزر نيم وباسورد
وتابع مين اللي موجود ومين اللي بيحمل وكدة
وممكن من خلاله تمنع المواقع الاباحية وتحولها لموقع اسلامي
والسيرفر الاشهر اللي الناس معظمها شغاله بيه هو الميكروتيك

عبارة عن اية السيرفر دة؟؟

دة عبارة عن كيسة بنتيوم 3 او اعلي
بتنزل عليها نسخة ميكروتيك ذي نسخة الويندوز كدة
وبتركب في الكيسة دي كارتين شبكة عاديين (لان)
واحد ياخد النت من الروتر للسيرفر والتاني يخرج النت من السيرفر
ذي مانت عاوز لسويتش او لاكسس او لاجهزة اي حاجة

ودة شكل عام لشبكة
استخدم فيها البوليت والانتنا 15 دي بي اوت دور
كجهاز ارسال
وواضح طبعا مكان توصيل السيرفر

وفى النهايه ارجو اكون قد وفقت فى شرح اساسيات الشبكه الجديده وانا موجود لاى استفسار وانشاء الله هينزل مواضيع اكتر فى الايام القادمه 

AhmeD DoS